کراچی پی سی ہوٹل کے سابق جنرل منیجر جیفری اسکاٹ سسمن کو خفیہ ایجنسیوں کی جانب سے جاسوسی کے الزام میں گرفتار کیا گیا ہے ۔ جیفری اسکاٹ پر امریکی خفیہ ایجنسی سی آئی اے کے لیے کام کرنے کا الزام ہے ۔
سوشل میڈیا اور آزاد ذرائع سے موصول ہونے والی اطلاعات کے مطابق قانون نافذ کرنے والے اداروں نے ہوٹل کی نویں منزل پر جیفری اسکاٹ کے زیر رہائش کمرے پر چھاپہ مار کر کمرے میں موجود سامان قبضہ میں لے لیا ہے جس میں متعدد جعلی نمبر پلیٹس اور گاڑیوں کی جعلی رجسٹریشنز بھی شامل ہیں۔
ذرائع کے مطابق جیفری اسکارٹ کے کمرے پر چھاپہ ٹھوس خفیہ اطلاعات کے نتیجے میں مارا گیا۔ جیفری اسکارٹ کی کراچی اور اندرون سندھ میں کئی مشتبہ افراد سے ملاقاتوں کی خبریں بھی سامنے آرہی ہیں ۔
پولیس اور دیگر قانون نافذ کرنے والے اداروں کی جانب سے اس کاروائی کی اب تک تصدیق یا تردید نہیں کی گئی۔ صوبائی اور وفاقی حکومت کی جانب سے بھی اس پر کسی قسم کا بیان سامنے نہیں آیا ہے۔
دوسری جانب پی سی ہوٹل کی جانب سے اس خبر کی بھرپور تردید کی گئی ہے ۔ ہوٹل کے ترجمان کا اس حوالے سے کہنا تھا کہ میڈیا میں جھوٹی خبر چلائی جا رہی ہے جسکا مقصد پی سی ہوٹل اور حکومتی ایجنسیوں کو بد
نام کرنا ہے۔