اسلام آباد(ایجنسیاں)وفاقی وزیرخزانہ شوکت ترین کا کہنا ہے کہ پاکستان دنیا کے 139 ممالک میں مہنگائی کے اعتبار سےسب سے سستا ملک ہے۔وزیرخارجہ شاہ محمودقریشی نے کہاہے کہ ہماری حکومت تمام شعبوں میں اصلاحات نافذ کررہی ہے۔ مشکل فیصلے کرنا پڑ رہے ہیں جن سے وقتی طور پر پریشانی تو ہو رہی ہے لیکن آنے والے دنوں میں بہتری آئیگی۔وزیر مملکت اطلاعات فرخ حبیب کہتے ہیں کہ ہیلتھ کارڈ کا اجرا وزیراعظم کا شاندار کارنامہ ہے،عمران خان نے بلاامتیاز ہر شخص کی جیب میں 10لاکھ ڈال کر اسے لکھ پتی بنادیا ہے جبکہ وفاقی وزیر توانائی حماد اظہر کا کہنا ہے کہ پاکستان میں اس وقت ایماندار وزیر اعظم کیخلاف سارے کرپٹ کھڑے ہیں‘صرف پاکستان نہیں پوری دنیا مہنگائی کا سامنا کر رہی ہے۔وفاقی وزیر اطلاعات فواد چوہدری نے کہاکہ پاکستان اور آسٹریلیا کے درمیان 23سال بعد ٹیسٹ سیریز ہونے جارہی ہے اور پوری قوم کرکٹ کی اس بحالی کا جشن منا رہی ہے لیکن اگر کسی کے پیٹ میں مروڑ اٹھ رہے ہیں تو وہ ہماری چوں چوں کا مربہ اپوزیشن ہے جو عین اس وقت پنڈی میں اپنا کرائے کا شو کرنا چاہتی ہے جب پہلا ٹیسٹ شروع ہو رہا ہے ۔ تفصیلات کے مطابق شوکت ترین نے اتوار کو سوشل میڈیا پر نمبیوکے تازہ ترین کاسٹ آف لیونگ انڈیکس کا اسکرین شاٹ شیئر کرتے ہوئے کہا کہ پاکستان دنیا کے 139ممالک میں سب سے سستا ملک ہے۔دنیا کے سب سے بڑے لاگت کے ڈیٹا بیس نمبیوکے مطابق پاکستان میں اوسطاً چار افراد پر مشتمل خاندان کا خرچہ تقریباً 171,783.24روپے ماہانہ (بغیر کرائے کے) ہے جبکہ ایک فرد کے تخمینہ ماہانہ اخراجات 51,798.76روپے (بغیر کرایہ کے) ہیں۔ڈیٹا بیس نے اندازہ لگایا ہے کہ پاکستان میں رہنے کی لاگت اوسطاً امریکہ کے مقابلے میں 71.52فیصد کم ہے۔ اسی طرح ویب سائیٹ کے مطابق پاکستان میں رہائش کا کرایہ، اوسطاً، امریکہ کے مقابلے میں 90.64فیصد کم ہے۔نمبیوڈیٹا بیس کے مطابق پاکستان میں فی لیٹر دودھ کی اوسط قیمت 122.56روپے، چاول کی فی کلو قیمت 159.07روپے اور انڈے کی فی درجن قیمت 175.04روپے ہے۔اسی طرح پاکستان میں مرغی کے گوشت کی فی کلو قیمت 393.45روپے فی کلو، گائے کا گوشت 645.1روپے فی کلو، سیب 170روپے فی کلو، سنگترہ 115.29روپے فی کلو، ٹماٹر 77.86 روپے فی کلو، آلو 55.16روپے فی کلوگرام ہے۔