وسیع البنیاد مذاکرات کی تجویز مسترد
اسلام آباد(ٹی وی رپورٹ‘ایجنسیاں) تحریک انصاف نے وزیراعظم شہباز شریف کی وسیع البنیاد مذاکرات کی تجویز مسترد کردی۔پی ٹی آئی رہنماءشاہ محمود قریشی کا کہنا ہے کہ ہم ڈائیلاگ کے قائل ہیں لیکن مسلط کئے گئے لوگوں سے بات چیت نہیں ہوسکتی ۔ادھرتحریک انصاف کے رہنما فرخ حبیب نے وزیر اعظم شہباز شریف کے حالیہ خطاب پر ردعمل دیتے ہوئے کہاکہ مکاری، طوطاچشمی کا انسانی نمونہ بنے کرائم منسٹر قوم کے سامنے کھڑے ہیں، گرینڈ ڈائیلاگ کا شوشہ ناکامی اور پھیلائی گئی معاشی تباہی کا اعتراف ہے‘کرائم منسٹرجان لیں قوم کا لوٹا گیا پیسہ واپس کیے بغیر نجات کی راہ ممکن نہیں‘بیرونی سازش سے مسلط ہونے کے بعد یہ شخص معیشت کا جنازہ نکال چکا، تیل، بجلی، گیس مہنگا کرکے کرائم منسٹر معیشت کے مضحکہ خیز دعوے کررہے ہیں۔فرخ حبیب نے کہا کہ لوگوں کی قوت خرید تباہ کرکے 2ہزار روپے کے لالی پاپ کا اعلان شرمناک ہے، کرائم منسٹر ڈائیلاگ جیسے شوشے کی بجائے بغیر تیاری مسلط ہونے پر معافی مانگتے۔ کسی ڈائیلاگ کیلئے نہیں بیرونی ایجنڈے کی تکمیل کیلئے کٹھ پتلی کو بٹھایا گیا۔انہوں نے کہا کہ آج یہ امپورٹڈ بندوبست براہ راست ملکی وقومی سلامتی کے لئے خطرہ ہے‘ کٹھ پتلیوں کا قابل نفرت تماشا بند کرکے انتخابات کی جانب جایا جائے۔