مہنگائی میں اضافہ ہوگا

مہنگائی میں اضافہ ہوگا، پٹرول پر سبسڈی کم نہ کرتے تو ملک ڈیفالٹ کر جاتا، بجلی کی قیمت بڑھانے کی فی الحال تجویز نہیں، وزیر خزانہ
اسلام آباد (اے پی پی، ٹی وی رپورٹ) وفاقی وزیر خزانہ ومحصولات مفتاح اسماعیل نے کہا ہے کہ یہ حقیقت ہے کہ پیٹرول اورڈیزل کی قیمت بڑھانے سے مہنگائی میں اضافہ ہوگالیکن اگرایسا نہ کرتے توروپیہ کی قدرمزیدگرجاتی اورملک اورمعیشت کانقصان ہوتا،پٹرول پر سبسڈی کم نہ کرتے توملک ڈیفالٹ کرجاتا، بجلی کی قیمت بڑھانے کی فی الحال تجویز نہیں۔
وزیراعظم سستا پیٹرول سستا ڈیزل اسکیم کے تحت ایک کروڑ40 لاکھ پاکستانی گھرانوں کو ماہانہ دوہزار روپے وظیفہ دیا جائیگا، اسکیم سے 8 کروڑ 40لاکھ افراد یا ایک تہائی آبادی مستفید ہونگے۔
جون تک آئی ایم ایف کے ساتھ اسٹاف لیول کامعاہدہ ہوجائیگا،اس کے بعد پاکستان کو3؍ ارب ڈالر کی نئی قسط ملے گی، رواں ہفتے چین سے مالی پیکیج کی اچھی خبر ملے گی، جبکہ عالمی بینک ایک ارب، ایشیا انفرااسٹرکچر بینک اور سعودی عرب بھی مدد کرینگے۔
ہم سیاسی دباؤ کاسامنا کرینگے اوروہ فیصلے کرینگے جوملک اورقوم کے مفادمیں ہوں، نئے مالی سال کابجٹ 10 جون کوپیش کیاجائیگا۔ ان خیالات کا اظہار وفاقی وزیر خزانہ نے ہفتہ کویہاں وزیرمملکت ڈاکٹرعائشہ غوث پاشا کے ہمراہ پریس کانفرنس کرتے ہوئے کیا۔
وزیرخزانہ نے بتایاکہ وزیرعظم نے گزشتہ رات قوم سے خطاب میں جواعلانات کئے ہیں ان سے ملک کے غریب اورکم آمدنی رکھنے والے طبقات کوفائدہ پہنچے گا، یہ حقیقت ہے کہ پیٹرول اورڈیزل کی قیمت بڑھانے سے مہنگائی میں اضافہ ہوگالیکن اگرایسا نہ کرتے توروپیہ کی قدرمزیدگرجاتی اورملک اورمعیشت کانقصان ہوتا،مشکل اورسخت فیصلہ
ملک وقوم کے مفاد میں کیاہے، اس فیصلے سے روپیہ کی قدرپراچھا اثرپڑا ہے۔ اسٹاک مارکیٹ میں بھی تیزی آئی ہے، اس سے لیکویڈیٹی کادباؤ کم ہوجائیگا۔ وزیرخزانہ نے کہاکہ غریب پروری وزیراعظم شہبازشریف کی روایت ہے، سابق حکومت کی پالیسیوں کی وجہ سے مہنگائی کاجوطوفان آیاہے اسکے تدارک کیلئے حکومت سے جوکچھ ہوگا وہ کریگی۔
انہوں نے کہاکہ وزیراعظم سستا پیٹرول سستا ڈیزل اسکیم کے تحت ایک کروڑ40 لاکھ پاکستانی گھرانوں کو ماہانہ دوہزارروپے وظیفہ دیا جائیگا، یہ بے نظیرانکم سپورٹ پروگرام سے حاصل معاونت سے اضافی ہوگا، اس اسکیم سے 8 کروڑ 40لاکھ افراد یا ایک تہائی آبادی مستفید ہو گی۔
اس اسکیم کی لاگت 28ارب روپے ہے، اس اسکیم سے 73لاکھ وہ گھرانے جو بی آئی ایس پی میں رجسٹرڈ ہیں، مستفید ہونگے اسکے علاوہ 67لاکھ وہ گھرانے بھی شامل ہیں جوبی آئی ایس پی میں شامل تونہیں مگر ان کا پاورٹی کااسکور37 سے کم ہے، ایسے گھرانے ٹیلی فون نمبر786 پراپنا شناختی کارڈ نمبرارسال کرکے یہ امداد حاصل کرسکیں گے، اس میں گھرانوں کی سربراہ خواتین اوربیواوں کوترجیح دی جائیگی۔
وزیرخزانہ نے کہاکہ پاکستان بیوروبرائے شماریات کے مطابق پاکستان میں ایک گھرانہ اپنی آمدنی کا 5 فیصد ٹرانسپورٹ پرخرچ کرتا ہے اسی پیمانہ کے مطابق آمدنی کے پانچ فیصد کے مطابق امداد دی جائیگی، اس اسکیم کوآئندہ مالی سال کے بجٹ میں شامل کیا جائیگا۔
وزیرخزانہ نے کہاکہ پیٹرول اورڈیزل کی قیمتوں میں اضافہ سے حکومت کو60 ارب روپے کاکم نقصان ہوگا، پاکستان میں پیٹرول کی ماہانہ کھپت 2کروڑ لیٹرکے قریب ہے، پیٹرول اورڈیزل کی سبسڈی سے امیرطبقات سب سے زیادہ استفادہ کررہے تھے جودرست طریقہ کارنہیں ہے۔
عمران خان کی حکومت نے آئی ایم ایف سے جومعاہدہ کیا تھا اس میں انہوں نے ایک روپیہ کی سبسڈی نہ دینے کے عہد کیا تھا، اسی فارمولا کے مطابق ڈیزل کی قیمت 300 روپے اور پیٹرول کی قیمت 260 سے لیکر270 روپے فی لیٹرہونا چاہیے مگرہم نے ایسانہیں کیا، ہم غریب لوگوں پرزیادہ بوجھ نہیں ڈالنا چاہتے۔ ہم جی ایس ٹی اورلیوی بھی نہیں لگائینگے۔
وزیرخزانہ نے کہاکہ شوکت ترین باربارکہتے ہیں کہ ہم نے سبسڈی کیلئے پیسہ چھوڑا ہے۔ انہوں نے اس مد میں ایک روپیہ بھی نہیں چھوڑا، شوکت ترین نے 25 ارب کا پرائمری خسارہ ہونے کا دعویٰ کیاتھا اورسب کومعلوم ہے کہ یہ خسارہ 1323 ارب روپے سے زیادہ ہوگا۔
وزیرخزانہ نے کہاکہ وہ نہیں کہہ سکتے کہ پیٹرول کی قیمت میں آئندہ اضافہ ہوگا یا نہیں، مجھے نہیں لگتا کہ اس میں جلد مزیداضافہ ہو ۔انہوں نے کہاکہ بجلی کی قیمت بڑھانے سے متعلق ابھی کوئی سمری نہیں آئی ہے۔
وزیرخزانہ نے کہاکہ دوحہ میں آئی ایم ایف کیساتھ مذاکرات میں پاورپلانٹس کی نجکاری کی کوئی بات نہیں ہوئی ہے لیکن ہم سمجھتے ہیں کہ نجکاری ہونی چاہیے۔ ہمیں امیدہے کہ جون تک آئی ایم ایف کے ساتھ اسٹاف لیول کا معاہدہ ہوجائیگا، اسکے بعد پاکستان کونئی قسط ملے گی۔
ایک سوال پروزیرخزانہ نے کہاکہ پیٹرول کی قیمت خوشی سے نہیں بڑھائی، عمران خان نے اس پرسیلزٹیکس اورلیوی عائد کی تھی، جب انکی حکومت جانے لگی توقیمتیں فریز کی گئی، جتنا ایک سویلین حکومت کاخرچہ ہوتا ہے اس سے زیادہ اس سبسڈی میں جارہا تھا۔ انہوں نے کہاکہ وزیرعظم کے اعلان کے مطابق یوٹیلیٹی اسٹورز سے متعلق اعلانات آج نافذ کئے جائینگے۔
ایک سوال پروزیرخزانہ نے کہاکہ سعودی عرب سے تین ارب ڈالررول اوور ہوجائینگے، سعودی عرب کے وزیر خزانہ نے اس حوالہ سے ایک بیان میں دیا ہے، سعودی عرب ہماری مزیدمددبھی کررہاہے مگرمیں ابھی اسکی تفصیلات نہیں دے سکتا۔
وزیرخزانہ نے کہاکہ پاکستان نے آئی ایم ایف کے پروگرام میں ایک سال کی توسیع اورمعاونت میں مزید2 ارب ڈالردینے کی درخواست کی ہے، آئی ایم ایف کے ساتھ معاہدہ سے عالمی بینک، ایشیاانفراسٹرکچر ڈولپمنٹ بینک، ایشیائی ترقیاتی بینک اوردیگرامداددینے والے ممالک اور ادارے ہماری معاونت کرینگے۔اس سے نئے راستے کھل جاتے ہیں جومعیشت کیلئے اہم ہے۔
وزیرخزانہ نے کہاکہ پیٹرول اورڈیزل کی قیمت بڑھانے کافیصلہ مشکل تھا مگر ایسا کرنا ناگزیرتھا، ہمیں پتہ ہے کہ اس سے ہمارے سیاسی سرمایہ میں کمی آئیگی مگرہمیں ریاست کے مفادات عزیز اور مقدم ہیں ، ہمیں لوگوں کی خدمت اورسیاست آتی ہے، ہم سیاسی دباؤ کاسامنا کرینگے اوروہ فیصلے کرینگے جوملک اورقوم کے مفادمیں ہوں۔