اسلام آباد(خبر ایجنسیاں، جنگ نیوز) نیشنل الیکٹرک اینڈ پاور ریگولیٹری اتھارٹی (نیپرا) نے فی یونٹ بجلی 3 روپے 10پیسے مہنگی کر دی،اضافہ دسمبر کے بلوں میں ادائیگی فروری میں، نوٹیفکیشن جاری، عوام پر 30 ارب سے زائد کا اضافی بوجھ آئے گا،آئل اینڈ گیس ریگولیٹری اتھارٹی (اوگرا) نے فروری کیلئے ایل این جی کی نئی قیمت کا نوٹیفکیشن جاری کردیا ،پیٹرول 13، ڈیزل18روپے لیٹر تک مہنگا ہونے کا خدشہ ہے۔تفصیلات کے مطابق نیپرا نے بجلی کی فی یونٹ قیمت میں 3 روپے 10 پیسے اضافے کا اعلان کر دیا،نیشنل الیکٹرک پاور ریگولیٹری اتھارٹی (نیپرا)کی جانب سے جاری بیان میں بتایا گیاہے کہ بجلی کی قیمتوں میں اضافہ ماہانہ فیول ایڈجسٹمنٹ کی مد میں کیا گیاجس کا اطلاق فروری کے بجلی کے بلوں پر ہو گا ،نیپرا نے بجلی کی قیمت میں اضافے کا نوٹیفکیشن بھی جاری کر دیا ہے جس کے مطابق بجلی دسمبر کی فیول پرائس ایڈجسٹمنٹ کی مد میں مہنگی کی گئی ہے، اضافے کے اطلاق 50 یونٹ والے صارفین اور کے الیکٹر ک کے صارفین پر نہیں ہو گا ، اضافے سے شہریوں پر 30 ارب سے زائد کا اضافی بوجھ آئے گا۔مزید برآں خدشہ ظاہر کیا جا رہا ہے کہ عالمی منڈی میں خام تیل کی بڑھتی ہوئی قیمت کا اثر پاکستان میں تیل کی قیمتوں پر بھی اثر انداز ہوسکتا ہے۔ذرائع کا کہنا ہےکہ یکم فروری سے عالمی منڈی میں پیٹرول ساڑھے 6 روپے اور ڈیزل 5 روپے لیٹر مہنگا ہوا اس طرح گزشتہ اعلان کا فرق صارفین کو منتقل ہوا تو پیٹرول 13 روپے لیٹر بڑھ سکتا ہے جب کہ ایسی صورت میں ڈیزل کی قیمت 18روپے لیٹر تک بڑھ سکتی ہے۔ دریں اثنا آئل اینڈ گیس ریگولیٹری اتھارٹی (اوگرا) نے فروری کیلئے ایل این جی کی نئی قیمت کا نوٹیفکیشن جاری کردیا۔اوگرا نے فروری کیلئے سوئی ناردرن سسٹم پر ایل این جی کی نئی قیمت 13.56 ڈالرمقرر کی ہے جب کہ سوئی سدرن سسٹم پرفروری کیلئے ایل این جی کی نئی قیمت 14.07 ڈالر مقرر کی گئی ہے۔اوگرا کے نوٹیفکیشن میں بتایا گیا ہےکہ دسمبر کے مقابلے میں جنوری میں ایل این جی کی قیمت 1.91 ڈالربڑھی، سوئی ناردرن سسٹم پرایل این جی کی قیمت 0.94 ڈالر اورسوئی سدرن سسٹم پر 1.91 بڑھی۔