عوامی رابطہ بمقابلہ عدم اعتماد، پارٹی رہنما جلسوں کا شیڈول بنائیں، عوام کو بتائیں گے ہمارے سوا کوئی آپشن نہیں، عمران خان

اسلام آباد(ٹی وی رپورٹ‘ایجنسیاں) حکومت نے اپوزیشن کے لانگ مارچ اور ممکنہ تحریک عدم اعتماد کا مقابلہ کرنے کے لئے ملک بھر میں جلسے جلوس اور عوامی رابطہ مہم شروع کرنے کا فیصلہ کیا ہےجبکہ وزیراعظم عمران خان نے بلدیاتی الیکشن کیلئے ٹکٹ میرٹ پر دینے اورپارٹی کا تنظیمی ڈھانچہ منظم کرنے کی ہدایت کرتے ہوئے کہاہے کہ تحریک انصاف ملک کی مقبول جماعت ہے‘ بلدیاتی انتخابات میں پوری قوت کےساتھ میدان میں اتریں گے، عوام کے پاس پی ٹی آئی کے علاوہ کوئی بہتر آپشن نہیں ہے‘اپوزیشن کے لانگ مارچ یا مہنگائی مارچ سے پریشان نہ ہوں یہ پہلے بھی ناکام ہوئے اور اب بھی ناکام ہوںگے کیونکہ عوام انہیں مسترد کر چکے ہیں۔ تفصیلات کے مطابق عمران خان نے بلدیاتی انتخابات کے لیے عوامی رابطہ مہم شروع کرنےکا فیصلہ کیا ہے۔ اسلام آباد میں عمران کی زیرصدارت پی ٹی آئی کی سینٹرل ایگزیکٹو کمیٹی کا اجلاس ہوا‘ ذرائع کے مطابق اجلاس میں وزیراعظم نے بلدیاتی انتخابات کے سلسلے میں عوامی جلسوں کا شیڈول تیار کرنے کی ہدایت کی‘ اجلاس میں بلدیاتی انتخابات میں ٹکٹوں کی تقسیم کےطریقہ کار پر بھی مشاورت کی گئی۔ ذرائع کا کہنا ہےکہ اجلاس میں بڑے شہروں میں میئرز کے ناموں کی تجاویز پر بھی غور کیا گیا۔ وزیراعظم کا کہنا تھا کہ ہمارے کارکن پارٹی کا قیمتی اثاثہ ہیں، بلدیاتی انتخابات میں میرٹ پر ٹکٹیں تقسیم کی جائیں گی۔ٹکٹ پارٹی سے مخلص اور تجربہ کار افراد کو دیئے جائیں گے‘ بندر بانٹ نہیں ہوگی نہ ہی اقربا پروری ہوگی‘ وزیراعظم نے ہدایت کی کہ دورہ چین کی کامیابی کو عوام میں اجاگرکیا جائے۔ مرکزی مجلس عاملہ کے اجلاس کے بعد پریس کانفرنس کرتے ہوئے وزیر مملکت اطلاعات فرخ حبیب نے کہا کہ عمران خان نے عوامی رابطے مہم شروع کرنے کا فیصلہ کیا ہے‘ اضلاع کی سطح پر پارٹی ورکرز کنونشن منعقد کئے جائیں گے‘عمران خان بڑے عوامی اجتماعات سے خطاب کریں گے۔ وزیراعظم 9فروری کو(کل)فیصل آباد کا دورہ کریں جہاں وہ ہیلتھ کارڈ کا آغاز کریں گے‘ لوٹ کھسوٹ ٹولہ تیتر بٹیر کی دعوتیں اڑاتا پھر رہاہے‘ عمران خان کی وجہ سے ان کی ملاقاتیں ہورہی ہیں، کبھی ایک دوسرے کو گھسیٹنے کی بات ہوتی رہی، ان کا کیا مشترکہ ایجنڈا ہے، پاکستان یا عوام کے مفاد کے لئے اس میں کچھ ہے؟ او آئی سی کا اجلاس ہونے جا رہا ہے، ایسے موقع پر لانگ مارچ کی بات کرنے والے بتائیں انھیں ذاتی سلامتی یا ملکی سلامتی عزیز ہے، ہمیں لانگ مارچ یا احتجاج سے کوئی خوف نہیں ہے‘ اپنی ساڑھے تین سالہ کارکردگی عوام کے سامنے لے کر جارہے ہیں۔ان کاکہناتھاکہ سی ای سی اجلاس میں پارٹی کی تنظیم سازی مکمل کرنے کے لئے پارٹی صدور کو 15 دن کی ڈیڈ لائن دی گئی ہے، پارٹی کا مستقل پارلیمانی بورڈ بنا دیا گیا ہے۔