عمران خان تاریخی دورے پر روس پہنچ گئے، آج پیوٹن سے ملاقات، اہم معاہدے ہوں گے

اسلام آباد(اے پی پی‘ٹی وی رپورٹ) وزیر اعظم عمران خان صدر ولادی میر پیوٹن کی خصوصی دعوت پر2 روزہ تاریخی سرکاری دورہ پر روس پہنچ گئے ۔ائیر پورٹ پر وزیر اعظم کا استقبال روس کے ڈپٹی وزیر خارجہ نے کیا۔ماسکو ائیرپورٹ پرعمران خان کا شانداراستقبال کیاگیا‘ اس موقع پر پاکستان کا قومی ترانہ بھی بجایا گیا۔جمعرات کو (آج) عمران خان اور روس کے صدر پیوٹن کے مابین ملاقات اس دورے کا اہم ترین جزو ہوگاجبکہ دونوں ممالک کے درمیان گیس پائپ لائن کی تعمیر سمیت اہم معاہدے ہوں گے ۔ وزیراعظم عمران خان سے اہم روسی قیادت بشمول نائب وزیر اعظم، روسی سرمایہ کار اور تاجر بھی ملاقاتیں کریں گے ۔ صدر پیوٹن سے ملاقات میں وزیر اعظم بین الاقوامی اور خطے کے امور پر تبادلہ خیال کریں گے‘ملاقات میں روس پاکستان تعلقات خصوصاً توانائی کے شعبے پر بات چیت ہوگی۔ اسلاموفوبیا اور افغانستان کی صورتحال بھی زیر غور آئےگی۔ عمران خان ماسکو میں روس کی سب سے بڑی مسجد و اسلامک سنٹر کا دورہ کریں گے ۔عمران خان دو دہائیوں بعد روس کا دورہ کرنے والے پہلے پاکستانی وزیراعظم ہیں۔ وفاقی وزرا شاہ محمود قریشی‘ چوہدری فواد حسین‘ اسد عمر، حماد اظہر، مشیر تجارت عبدالرزاق دائود‘مشیر قومی سلامتی ڈاکٹر معید یوسف اور عامر محمود کیانی بھی دورے میں وزیراعظم کے ہمراہ ہیں۔