عدم اعتماد، اپوزیشن کو شکست ہوگی، یہ پلان سامنے لائیں، تیار ہوں، سب جیل جائیں گے، جب تک زندہ ہوں انہیں نہیں چھوڑوں گا، عمران خان

منڈی بہاؤ الدین(اے پی پی)وزیراعظم عمران خان نے کہا ہے کہ عدم اعتماد لانے پر اپوزیشن کو شکست ہوگی ،یہ پلان سامنے لائیں، تیار ہوں، سب جیل جائینگے، جب تک زندہ ہوں انہیں نہیں چھوڑونگا،نواز کو باہر بھیجنا بڑی غلطی، شہباز دل کا کمزور، مریم ججز کو ڈرارہی ہیں، جب تک قوم کا لوٹا ہوا پیسہ واپس نہیں کرتے این آر او نہیں ملے گا،اپوزیشن ڈاکوئوں کا ٹولہ ہے جو مجھ سے ڈرتا ہے، 30برس بعد اسمبلی ڈیزل کے بغیر سولر پر چل رہی ہے،وفاقی وزیر اطلاعات و نشریات چوہدری فواد حسین نے کہا ہے کہ اپوزیشن سے لانگ مارچ تو دور واک بھی نہیں ہوگی، نواز شریف، شہباز شریف اور بلاول بھٹو کی سیاست ختم ہو چکی ہے، عمران خان کو جو اپوزیشن چیلنج کر رہی ہے وہ اپنے پائوں پر چل نہیں سکتی، لانگ مارچ کیا کرے گی۔ جمعہ کو منڈی بہائو الدین میں عوامی رابطہ مہم کے سلسلہ میں جلسہ عام سے خطاب کرتے ہوئے وزیراعظم عمران خان نے کہاکہ نواز شریف کو کبھی ایک بیماری، کبھی دوسری بیماری ہو رہی تھی، نواز شریف بیماری کا بہانہ بنا کر ملک سے بھاگا، جب تک قوم کا لوٹا ہوا پیسہ واپس نہیں کرتے این آر او نہیں ملے گا، لوٹی ہوئی دولت کی واپسی تک چوروں کا پیچھا نہیں چھوڑوں گا، جب خیبرپختونخوا میں ہماری پہلی حکومت قائم ہوئی تو ہم سے کہا جاتا تھا کہاں ہے نیا خیبرپختونخوا؟ لیکن جب 2018ء میں خیبرپختونخوا میں انتخابات ہوئے تو عوام نے ہمیں دو تہائی اکثریت دی کیونکہ ہمارے دور میں خیبرپختونخوا میں تیزی سے غربت میں کمی آئی تھی، اپوزیشن چوروں کا ٹولہ اور ڈاکوئوں کا گلدستہ ہے، اس میں ایک شخص ہے جسے میں مولانا نہیں کہتا، ڈیزل سب کو اکٹھا کرکے ہر دو مہینے بعد حکومت گرانے کی بات کرتا ہے، پہلی بار اسمبلی ڈیزل کے بغیر چل رہی ہے، ڈیزل 12واں کھلاڑی بنا ہوا ہے،اپوزیشن ڈری ہوئی ہے، فضل الرحمن ان کو ڈرا رہا ہے کہ جلدی سے حکومت گرائو ورنہ 2023ء کا الیکشن بھی گیا، ایک بڑا بھگوڑا میاں ہے اور دوسرا چھوٹا میاں ہے جس کا دل بڑا کمزور ہے اسے پتہ چل گیا ہے کہ مقصود چپڑاسی کے اکائونٹ میں 375 کروڑ روپے کیسے آ گئے،یہ چور اور ڈاکو ڈرے ہوئے ہیں، 20 سال سے ایک دوسرے کو چور اور ڈاکو کہہ رہے ہیں،مقصود چپڑاسی چھوٹے میاں کی رمضان شوگر مل میں 15 ہزار روپے کا ملازم تھا، اس کے بینک اکائونٹ میں ایف آئی اے نے پتہ چلایا کہ 375 کروڑ روپے آ گیا ہے جس پر پہلے چھوٹے میاں نے اپنے بیٹے کو لندن راتوں رات فرار کرایا، پھر اپنے داماد کو بھی باہر بھجوا دیا، اس سے پہلے بھگوڑے میاں کے دو بیٹے (ن) لیگ کے دور میں باہر چلے گئے تھے، منشی اسحاق ڈار کو کون بھول سکتا ہے اسے شاہد خاقان عباسی جب وزیراعظم تھا تو عوام کے ٹیکس کے پیسے پر اپنے جہاز میں اسے باہر بھجوا دیا، اگر انہوں نے چوری نہیں کی تو ڈر کس بات کا ہے، ان سب کو عمران خان کا ڈر ہے کیونکہ عمران خان کی کوئی قیمت نہیں لگا سکتا، پرویز مشرف کی طرح انہیں این آر او نہیں ملے گا، پرویز مشرف نے تو حدیبیہ پیپرز ملز کیس میں این آر او دے دیا تھا، مقدمات ان کے پرانے ہیں این آر او ہم سے مانگ رہے ہیں۔