راولپنڈی( نیوز، خبرایجنسی) شمالی وزیرستان میں دہشتگردی کی کوشش ناکام ،سکیورٹی فورسز نے خودکش حملہ آور کو مار گرایا۔ پاک فوج کے شعبہ تعلقات عامہ (آئی ایس پی آر) کے مطابق شمالی وزیرستان کے علاقے ڈوسالی میں خودکش حملہ آور نے ملٹری پوسٹ میں گھسنے کی کوشش کی اور اہلکاروں پر چھوٹے ہتھیاروں سے فائرنگ کی۔ آئی ایس پی آر کا کہنا ہے کہ خودکش حملہ آور نے اہلکاروں پر ہینڈ گرنیڈ سےحملے کی بھی کوشش کی تاہم سکیورٹی اہلکاروں کی جوابی کارروائی میں خودکش حملہ آور مارا گیا۔ آئی ایس پی آرنے بتایا کہ ہلاک دہشت گرد سے اسلحہ اور گولہ بارود برآمد ہوا جبکہ مارے گئے دہشت گرد کی شناخت شریف کے نام سے ہوئی۔