سندھ سے بھی ڈاکو راج ختم کریں گے، وفاقی وزراء

کراچی‘ملتان (اسٹاف رپورٹر ) وفاقی وزراءاسدعمر ‘ علی زیدی اور مخدوم شاہ محمود قریشی کا کہنا ہے کہ 14سال سے سندھ کو ڈاکو چلا رہے ہیں ‘صوبے کو ڈاکوراج سے آزادی دلوائیں گے‘اگلی بار سندھ میں تحریک انصاف حکومت بناکر دکھائے گی ‘پی ڈی ایم میں اتحاد نہیں رہا‘اپوزیشن انتشارکا شکار ہے ‘ بلاول لانگ مارچ کرنا چاہتے ہیں تو اپنا شوق پورا کریں۔تفصیلات کے مطابق اتوار کوکراچی میں پی ٹی آٹی کی صوبائی ایڈوائزری کمیٹی کے اجلاس کے بعد پریس کانفرنس میں وفاقی وزیر منصوبہ بندی اسد عمر نے سندھ حکومت کے کالے بلدیاتی قانون کو آئین سے متصادم قرار دیتے ہوئے اس کے خلاف احتجاجی تحریک چلانے اور صوبے بھر میں عوامی رابطہ مہم شروع کرنے کا اعلان کردیا ۔ان کا کہناتھاکہ سندھ کو 14سال سے ڈاکو چلا رہے ہیں‘سندھ کوڈاکو راج سے آزادی دلوائیں گے۔ سندھ میں نا امیدی کا وقت ختم ہو چکا ہے‘ صوبے میں آئندہ حکومت پی ٹی آئی کی ہوگی ‘منگل کو کے فور کی حتمی منظوری کے بعد اس پر کام شروع ہوجائے گا‘ صوبے میں پرچی پر نوکریاں ملتی ہیں‘ تحریک انصاف کا میئر کراچی میں وہ کام کروائے گا جو سندھ حکومت نہیں کر سکی۔اس موقع پر وفاقی وزیرعلی زیدی کا کہناتھاکہ کراچی کو ٹھیک کرنے کے لیے زرداری مافیا کو گھر بھیجنا ہوگا ‘زرداری مافیا نے اپنے منشی کو سی ایم بنایا ہوا ہے‘ سندھ میں اگلی حکومت ہماری ہوگی ‘26فروی کو گھوٹکی سے کراچی تک مارچ میں پارٹی کی مرکزی قیادت شرکت کرے گی۔ دریں اثناءگزشتہ روز ملتان میں میڈیا سے گفتگو کرتے ہوئےوزیر خارجہ مخدوم شاہ محمود قریشی نے کہاکہ بلاول لانگ مارچ کرنا چاہتے ہیں تو اپنا شوق پوراکریں‘ پیپلز پارٹی نے جس طرح سینیٹ میں اسٹیٹ بینک بل پر نظر ثانی کی ہے اسی طرح لانگ مارچ کے فیصلے پر بھی نظر ثانی کریگی۔ اگرپی پی نے پنجاب کی طرف لانگ مارچ کیا تو علی زیدی نے بھی سندھ کی طرف لانگ مارچ کی کال دیدی ہے۔ یوسف رضا گیلانی اگر چاہتے تو 5 گھنٹے میں اسلام آباد پہنچ سکتے تھے۔میں گیلانی صاحب کو پیشکش کرتا ہوں کہ وہ رات کو میرے ساتھ میری گاڑی میں سفر کریں صبح خیریت سے ان کوسینیٹ تک پہنچا دونگا۔