رجسٹرڈ فری لانسرز کی آمدنی پر ٹیکس ختم اپوزیشن کو کہتا ہوں گھبرانا نہیں، عمران خان

اسلام آباد(ایجنسیاں)وزیراعظم عمران خان نے کہا ہے کہ میں نے ہمیشہ اپنی ٹیم کو تلقین کی کہ ’’گھبرانا نہیں‘‘، آج اپوزیشن سے کہتا ہوں کہ ’’گھبرانا نہیں‘‘، پاکستانی نوجوانوں نے ہر شعبہ میں اپنی صلاحیتوں کا لوہا منوایا ہے ‘ ٹیکنالوجی کا انقلاب ہمارے ملک اور نوجوانوں کو ہرگزمس نہیں کرنا چاہئے ‘ حکومت ای۔تجارت کی راہ میں حائل تمام رکاوٹوں کو دور کرے گی، رجسٹرڈ فری لانسرز کیلئے زیرو ٹیکس کر دیا ہے، آئندہ چند سالوں کے دوران آئی ٹی کے شعبہ میں برآمدات 50 ارب ڈالر تک بڑھائی جا سکتی ہیں۔ ان خیالات کا اظہار انہوں نے پیر کو یہاں قومی ای۔تجارت پورٹل کی افتتاحی تقریب سے خطاب کرتے ہوئے کیا۔ وزیراعظم نے کہا کہ میرے بارے میں یہاں بات کی گئی کہ میں نے سب سے زیادہ جملہ کونسا بولا ہے تو میں خود آپ کو یہ بتانا چاہتا ہوں کہ میں نے سب سے زیادہ جو بات کہی وہ یہ ہے کہ ’’گھبرانا نہیں‘‘، ہم نے جب حکومت سنبھالی تو حالات بہت خراب تھے اور ملک دیوالیہ ہو چکا تھا، مجھے ٹیم کی فکر تھی کہ یہ گھبرا جائے گی، اس لئے میں نے انہیں تلقین کی کہ ’’گھبرانا نہیں‘‘اور آج میں اپوزیشن کو کہتا ہوں کہ ’’گھبرانا نہیں‘‘۔عمران خان کا کہناتھاکہ بل گیٹس کو دورہ پاکستان کی دعوت دینے کا مقصد یہ تھا کہ آئی ٹی کے شعبہ میں بھی ان کی خدمات سے استفادہ کیا جائے، اس سلسلہ میں آنے والے دنوں میں خوشخبری دوں گا۔