اسلام آباد(ایجنسیاں)اسپیکر اسد قیصر نے تحریک عدم اعتماد کیلئے قومی اسمبلی کا اجلاس 21 مارچ کو (آج )بلانے کی اپوزیشن کی وارننگ نظرانداز کردی۔ اسپیکر قومی اسمبلی اسد قیصر نے قومی اسمبلی کا اجلاس 25 مارچ، 2022 بروز جمعہ دن 11 بجے پارلیمنٹ ہاؤس میں طلب کر لیا ہے۔ قومی اسمبلی سیکرٹریٹ کی جانب سے اجلاس طلب کرنے کے جاری کئے گئےآرڈرکے مطابق8مارچ کو آئین کی شق 54(3)کے تحت اجلاس بلانے کیلئے ریکوزیشن جمع کرائی گئی۔ 21جنوری کو اسمبلی کے منعقدہ اجلاس میں اسمبلی ہال میں 22-23مارچ کو ہونے والے او آئی سی وزراء خارجہ کے اجلاس کو منعقد کرانے کے لیے تحریک منظور کی گئی تھی ۔وزارت خارجہ کی جانب سے اسمبلی ہال اور اس کی لابیوں کی تزئین و آرائش کی ضروریات کے تحت فروری کے آخر میں سی ڈی اے کی جانب سے کام شروع کیا گیا۔ 8مارچ کو ریکوزیشن موصول ہونے پر سینیٹ ہال کیلئے سینیٹ سیکرٹیریٹ سے رابطہ کیا گیا۔ سینیٹ ہال کی تزئین و آرائش کی وجہ سے ہال دستیاب نہ ہو سکا۔ آرڈر میں کہا گیا ہے کہ بعد ازاں چیئرمین سی ڈی اے اور ڈپٹی کمشنر اسلام آباد کو اسمبلی اجلاس کے لیے موزوں جگہ کا بندوبست اور فراہم کرنے کیلئے کہا گیا۔چیئرمین سی ڈی اے اور ڈپٹی کمشنر اسلام آباد نے تحریری طور پر مناسب جگہ کی عدم دستیابی کے بارے میں آگاہ کیا۔ ان حقائق اور حالات کی وجہ سے 24مارچ سے پہلے اسمبلی کا اجلاس منعقد کرانا ممکن نہ تھا۔اسپیکر اسد قیصر نے اسمبلی کا اجلاس آئین کی شق 54(3) اور شق 254کے تحت تفویض اختیارات کو بروے کار لاتے ہوئے طلب کیا۔اجلاس اپوزیشن کی جانب سے جمع کرائی گئی ریکوزیشن پر طلب کیا گیا ہے۔