بلوچستان بلدیاتی الیکشن
کوئٹہ(ایجنسیاں) صوبہ بلوچستان کے 32اضلاع میں ہونے والی بلدیاتی انتخابات میں آزادامیدواروں نے1310سیٹوں پر کامیابی حاصل کرلی جبکہ جمعیت علماءاسلام دوسرے اور بلوچستان عوامی پارٹی تیسرے نمبر پر ہے ۔انتخابات کے دوران دستی بم ،راکٹ حملے ،فائرنگ اور لڑائی جھگڑوں کے واقعات میں 2افراد جاںبحق جبکہ سیکورٹی اہلکاروں سمیت 49افراد زخمی ہوئے ہیں کئی پولنگ اسٹیشنز پر گھنٹوں پولنگ کا عمل تعطل کا شکار رہا‘ بیلٹ پیپرز چھیننے اور جعلی ووٹ کاسٹ کرنے کی کوششوں کے واقعات بھیسامنے آئے‘وزیراعلی نے پرتشدد واقعات کا نوٹس لیتے ہوئے سخت کارروائی کی ہدایات جاری کردی ہیں۔تفصیلات کے مطابق بلوچستان کے 32اضلاع کے4ہزار 456شہری اور دیہی وارڈز میں پولنگ ہوئی۔الیکشن کمیشن کے مطابق 32اضلاع میں بلدیاتی انتخابات کیلئے14ہزار 611امیدوار میدان میں ہیں، بلدیاتی انتخابات میں ایک ہزار 584وارڈز میں امیدوار بلا مقابلہ منتخب ہوچکے ہیں،رات گئے تک موصول ہونے والے غیر حتمی وغیرسرکاری نتائج کے مطابق تمام اضلاع میں آزاد امیدواروں کی کامیابی کا تناسب سب سے زیادہ ہے۔ جمعیت 98‘باپ 71‘پشتونخوا میپ 39‘پیپلزپارٹی 26، نیشنل پارٹی 26 ، بی این پی مینگل 18، تحریک انصاف 10، ن لیگ کے 36امیدوار کامیاب ہوئے ۔ نامہ نگار کے مطابق میونسپل کمیٹی گوادر کے انتخابات میں حق دو تحریک نے میدان مارلیا‘33میں سے 26نشستوں پر فتح حاصل جبکہ میں بی این پی(مینگل)‘ نیشنل پارٹی، جمعیت علمائے اسلام ف اور بی این پی( عوامی)پر مشتمل چار جماعتی اتحاد بری شکست سے دوچارہوگیا‘ تربت سے نامہ نگار کے مطابق اب تک نیشنل پارٹی میونسپل کارپوریشن تربت کی 52جنرل نشستوں میں سے 14 پر کامیاب ہوگئی ہے۔ قلعہ عبداللہ سے نامہ نگار کے مطابق میونسپل کمیٹی قلعہ عبداللہ میں 13وارڈز پر جے یوآ ئی فضل الرحمن کے 6امیدوار آزاد 5امیدوار اور پشتونخوا میپ کا ایک امیدوار منتخب ہوئے۔ اسی طرح ضلع بھر کے 28یونین کونسلوں میں پہلے نمبر پر آزاد امیدواران بھاری اکثریت سے کامیاب ہوئے ۔ گلستان سے نامہ نگار کے مطابق یونین کونسل گلستان 1 یونین کونسل گلستان 2 یونین کونسل خڑگی گلستان پر قبائلی فیصلے کے مطابق تمام امیدواران بلا مقابلے منتخب ہوگئے۔میونسپل کمیٹی ڈھاڈر میں رند پینل نے میدان مار لیا ۔ سات میں سے چھ وارڈز میں رند پینل کے امیدوار کامیاب قرار پائے۔ڈیرہ اللہ یارمیونسپل کارپوریشن کے21 وارڈز میں ہونے والے انتخابات میں بلوچستان عوامی پارٹی کے میرفا ئق خان جمالی کے حمایت یافتہ امیدواروں نے میدان مار لیا‘21 وارڈزمیں سے 17پر بلوچستان عوامی پارٹی یا ان کے حمایت یافتہ آزاد امیدوارکامیاب ہوئے۔ دکی سے نامہ نگار کے مطابق میونسپل کمیٹی دکی پر ملک کلیم اللہ ترین پینل نے اکثریت حاصل کرلی ۔ 5وارڈ میں 4آزاد ایک جمعیت علماء اسلام کاامیدوار کامیاب ہوا۔ میونسپل کارپوریشن خضدار میں بلوچستان عوامی پارٹی ، بلوچستان نیشنل پارٹی،جمعیت علماء اسلام اور نیشنل پارٹی کا اپنے اپنے امیدواروں کی کامیابی کا دعویٰ حتمی نتائج آج موصول ہونگے۔یونین کونسل نوکنڈی 20 اور 21 کے متعدد وارڈز میں خان سنجرانی پینل نے میدان مار لیا۔ژوب سے نامہ نگار کے مطابق بلدیاتی انتخابات ڈسٹرکٹ کونسل کے 163وارڈز پر انتخابات مکمل78 پولنگ اسٹیشنوں کے غیر حتمی و غیر سرکاری نتائج موصول 25آزاد امیدوار سرفہرست جے یو آئی نے 18مسلم لیگ (ن) نے 15اور بی اے پی نے 14نشستیں حاصل کی ہے ۔ادھر ووٹنگ کے دوران مختلف اضلاع میں افسوسناک واقعات رونما ہوئے ، منگچر میں 2دستی بم پھینکے گئے جبکہ کوہلو میں3 راکٹ فائر ہوئے‘تربت کے علاقے ڈھنک کے گرلز مڈل اسکول میں دستی بم حملہ کیا گیا تاہم کوئی جانی نقصان نہیں ہوا۔۔ کوہلو ہی میں یونین کونسل 6کے وارڈ نمبر 2مصری خان ماکوڑی پولنگ اسٹیشنز پرووٹرز کے درمیان تصادم کے نتیجے میں 8افراد زخمی ہوئے ‘پریزائیڈنگ آفیسر کے مطابق تصادم کے بعد پولنگ اسٹیشن پر بھی حملہ کیا گیا۔ کوہلو کے میونسپل کمیٹی کے وارڈ نمبر1میں خواتین پولنگ اسٹیشن کے قریب فائرنگ ہوئی جس کے بعد پولنگ اسٹیشن میں حالات کشیدہ ہوئے۔جعفر آباد کی تحصیل جھٹ پٹ کی یونین کونسل وادھواہ کی فی میل پولنگ اسٹیشنز پر دو گروپوں میں تصادم ہوا جس میں لاٹھیوں اور ڈنڈوں کے وار سے 6افراد زخمی ہوئے جس پر پولنگ کا عمل روک دیا گیا‘چاغی کی یونین کونسل پدگ میں پولنگ کے دوران فائرنگ کے ایک واقعے میں ایک شخص زخمی ہوا جسے ہسپتال منتقل کیا جارہا تھا مگر وہ زخمی کی تاب نہ لاتے ہوئے چل بسا۔