بازاروں کی بجلی 7 بجے بند کمرشل فیڈرز پر سپلائی رات 10 بجے تک معطل رہے گی
اسلام آباد (نیوز ایجنسیز) بجلی کی بچت کے لیے حکومت نے بازاروں کی بجلی شام 7بجے بندکرنے کا فیصلہ کیا ہے،کمرشل فیڈرز پر سپلائی رات 10 بجے تک معطل رہے گی، ٹیوب ویلز کے فیڈرز بھی شام 7سے رات 11بجے تک بند رہیں گے، 8؍ ہزار میگاواٹ بجلی کی بچت ہوگی، وزارت پاور ڈویژن نے سمری تیار کرلی،منظوری اسی ہفتے متوقع ہے،حکومت نےبجلی بلوں میں ریلیف بھی ختم کر دیا ، وفاقی وزراء وزیر دفاع خواجہ محمد آصف ، وفاقی وزیر مواصلات مولانا اسعد محمود ، مشیر برائےامور کشمیر قمر الزمان کائرہ ، وزیر مملکت برائے پٹرولیم مصدق ملک نے جمعرات کو پی آئی ڈی میں مشترکہ پریس کانفرنس سے خطاب کرتے ہوئے تاجروں سے کفایت شعاری کی استدعا کرتے ہوئے کہا کہ دنیا بھر میں مارکیٹیں رات گئے کے بجائے شام 6 بجے بند ہوجاتی ہیں، عمران حکومت کے معاہدے میں پٹرول پر مزید ٹیکس شامل تھے، پاور ڈویژن کی سمری کے مطابق ملک بھر کےکمرشل فیڈرز کو شام 7 سے رات 10 بجے تک بند کرنےکا فیصلہ کیا گیا ہے، کمرشل فیڈرز پر دن کے اوقات میں لوڈشیڈنگ نہیں ہوگی۔ذرائع پاور ڈویژن کا کہنا ہےکہ کمرشل فیڈرز کی بندش سے 5 ہزارمیگاواٹ بجلی کی بچت ہوگی، شام 7 سے رات 11 بجے تک ٹیوب ویل کے فیڈر ز کی بجلی بھی بند رکھنےکا فیصلہ کیا گیا ہے، ٹیوب ویل والے فیڈرزبند ہونے سے 3 ہزار میگاواٹ بجلی کی بچت ہوگی۔ ذرائع نے بتایا ہےکہ ان تجاویز کی اسی ہفتے وزیراعظم اور کابینہ سے منظوری لی جائے گی۔ ذرائع پاور ڈویژن کا کہنا ہےکہ تاجروں کی جانب سے دکانیں جلد بند کرنے سے انکار پر متبادل تجاویز تیار کی گئی ہیں، وزارت پاور ڈویژن نے بجلی کے بلوں پر صارفین کو دی جانے والی سبسڈی ختم کرنے کا نوٹیفکیشن جاری کردیا ہے۔ لیسکو کے نام جاری کئے گئے نوٹیفکیشن میں واضح کیا گیا ہے کہ رواں ماہ جون سے بجلی صارفین کو دی جانے والی 5 روپے فی یونٹ سبسڈی کو ختم کردیا گیا ہے۔ وزارت پاور ڈویژن کے اس اقدام کے بعد لیسکو کے بجلی صارفین کو رواں ماہ کے بجلی کے بل بھاری رقوم کے ساتھ بھیجے جانے کا امکان ہے۔اسلام آباد میں پریس کانفرنس کے دوران وزیر دفاع خواجہ آصف نے عوام سے کفایت شعاری کی اپیل کرتے ہوئےتجویز دی کہ کاروبار جلد بند کرنے سے ملک میں 4 ہزار میگاواٹ بجلی کی بچت ہوسکتی ہے، تیسری دفعہ پٹرول کی قیمتوں میں اضافہ کرنا پڑا، معیشت ہمیں کھنڈرات کی حالت میں ملی، پی ٹی آئی کی حکومت نے ایسی مشکلات پیدا کردیں۔ پٹرولیم مصنوعات کی قیمتیں نہ بڑھاتے تو ملک دیوالیہ ہونے کی طرف چلا جاتا، ہمیں پانی، بجلی اور گیس کے استعمال میں کفایت شعاری کرنی ہوگی۔ خواجہ آصف نے کہا کہ عمران خان کہتے ہیں کہ ان کے خلاف سازش ہوئی جس میں ادارے شامل ہیں لیکن وہ اپنی کارکردگی پر بات نہیں کرتے۔