آئی ایم ایف نے منظوری دیدی، پاکستان کو ایک ارب ڈالر کی چھٹی قسط مل جائے گی، معیشت کے استحکام اور اصلاحات کے عمل میں مدد ملے گی، حکومت

اسلام آباد ، کراچی ( نیوز ڈیسک) عالمی مالیاتی فنڈ (آئی ایم ایف) نے پاکستان کیلئے چھٹی قسط کی منظوری دیدی، وزیر خزانہ شوکت ترین کا کہنا ہے کہ آئی ایم ایف نے توسیعی فنڈ سہولت کے تحت پاکستان کے لیےایک ارب ڈالرز کی منظوری دے دی ہے۔ یہ آئی ایم ایف پروگرام کا مشکل ترین جائزہ تھا، جس کے لیے حکومت کو اسٹیٹ بینک ترمیمی ایکٹ اور ٹیکس استثنیٰ ختم کرنے کے پیشگی اقدامات کرنا پڑے،وفاقی وزیر اطلاعات فواد چوہدری کا کہنا تھاکہ آئی ایم ایف بورڈ نے پاکستان کا چھٹا نظرثانی بورڈ مکمل کر لیا۔ انہوں نے بتایا کہ آئی ایم ایف بورڈ نے پاکستان کو ایک ارب ڈالر کی قسط کے اجرا کا فیصلہ کیا ہے۔وفاقی وزیر اطلاعات فواد چوہدری کا کہنا تھاکہ فیصلے سے معیشت کے استحکام اور اصلاحات کے عمل میں مدد ملے گی۔ تفصیلات کے مطابق، آئی ایم ایف ایگزیکٹیو بورڈ نے توسیعی فنڈ سہولت (ای ایف ایف) کے تحت چھٹے جائزے کی منظوری دیتے ہوئے پاکستان کے لیے 1 ارب ڈالرز کی قسط جاری کردی ہے۔ وزیر خزانہ شوکت ترین نے بدھ کی رات ٹوئٹ کرتے ہوئے کہا کہ مجھے یہ اعلان کرتے ہوئے خوشی محسوس ہورہی ہے کہ آئی ایم ایف بورڈ نے پاکستان کے لیے اپنے پروگرام کی چھٹی قسط منظور کرلی ہے۔ آئی ایم ایف کے جاری پروگرام کا یہ مشکل ترین جائزہ تھا کیوں کہ پاکستان نے چوتھے اور پانچویں جائزے کے موقع پر 750 ارب روپے کے ٹیکس اقدامات اور اسٹیٹ بینک خودمختاری بل پارلیمنٹ میں جمع کرنے کا وعدہ کیا تھا۔ جب کہ یہ وعدہ بھی کیا گیا تھا کہ بجلی کے ٹیرف میں 4.75 روپے فی یونٹ اضافہ کیا جائے گا لیکن مقررہ مدت میں کسی پر بھی عمل درآمد نہیں ہوا۔ جب اکتوبر میں تکنیکی بنیادوں پر پاکستان نے آئی ایم ایف سے مذاکرات شروع کیے تو اسٹاف سطح کے معاہدے پر اتفاق رائے نہیں ہوسکا۔ جس کے بعد وزیر خزانہ شوکت ترین اور سابق سیکرٹری خزانہ کو آئی ایم ایف سے مذاکرات کرنا پڑے۔ جس میں آئی ایم ایف نے جی ایس ٹی استثنیٰ ختم کرنے کی بات کرتے ہوئے کہا کہ ٹیکس رکاوٹیں ختم کیے بغیر ٹیکس نظام درست نہیں ہوسکتا۔ اسٹیٹ بینک خودمختاری کے حوالے سے آئی ایم ایف کا کہنا تھا کہ ایسے مواقع گزرے ہیں جہاں مرکزی بینک کی خودمختاری پر سمجھوتہ کیا گیا لہٰذا ان دو شرائط کو پیشگی اقدامات کا حصہ بنایا جائے تاکہ پاکستان کے لیے اگلی قسط کی منظوری دی جاسکے۔ متعدد ماہرین اقتصادیات اور سیاسی جماعتوں نے اسے پارلیمنٹ کی خودمختاری پر سمجھوتہ قرار دیا۔ تاہم، حکومت پارلیمنٹ سے ان بلز کو منظور کرنے میں کامیاب رہی اور اسے ایکٹ آف پارلیمنٹ میں تبدیل کردیا گیا۔